Nanawagan karon og imbestigasyon ang usa ka opisyal sa Los Angeles County human nahulog ang usa ka dakong tipak sa yelo o ice gikan sa kahanginan ug mibuslot sa atop sa usa ka balay sa Whittierr, California.
Direktang nahulog ang maong yelo ibabaw sa sofa sulod sa sala.
Matod ni Janice Hahn, base sa flight data adunay milabay nga eroplano ibabaw mismo sa balay sa dihang nahitabo ang insidente.
Tungod niini, ilang gihangyo ang Federal Aviation Administration nga imbestigahan kung gikan ba gyud sa eroplano ang maong tipak sa yelo.
Gihulagway usab sa residente nga si Yuder Grau, nga anaa sulod sa balay atol sa hitabo, nga kusog nga pagbuto sa dihang nahulog ang yelo.
Samtang, namatikdan sa tag-iya sa balay nga si Thania Manga nga adunay dili maayong baho ang yelo.
Tungod niini, iyang giputos ug gitago sa freezer ang tipak aron masusi kung unsang kemikal o substansiya ang anaa niini.
Nangandam usab ang pamilya sa posibleng epekto niini sa ilang panglawas ug sa peligro nga dala sa mga eroplano nga pirming molabay sa ilang lugar.