Gipalig-on sa Department of Agriculture (DA) ang ilang pagpangandam sa posibleng epekto sa El Niño nga mahimong magdala og grabeng kainit, kakulang sa ulan, ug hulaw sa umaabot nga mga bulan sa nasud.
Matud ni Agriculture Secretary Francisco Tiu Laurel Jr., padayon ang operasyon sa mga irigasyon aron matabangan ang mga mag-uuma sa pagpadayon sa produksyon sa agrikultura.
Gipalapdan usab sa DA ang mga cold storage facility aron mapreserbar ang mga ani ug malikayan ang post-harvest losses, ug mamenosan ang pagsalig sa importasyon.
Naghatag na usab ang gobyerno og financial assistance alang sa mga mag-uuma nga maapektuhan sa El Niño, samtang nagpasidaan nga posibleng mosaka ang presyo sa mga palaliton kung moubos ang ani.
Base sa PAGASA, adunay 79 porsiyento nga posibilidad sa El Niño nga magsugod sa Hunyo 2026 ug posibleng molungtad hangtod sa unang bahin sa 2027.
Dungan niini, nag-awhag ang DA sa publiko nga magtipid sa paggamit sa tubig aron malikayan ang grabeng epekto sa posibleng hulaw.