Subling gideklara sa Democratic Republic of Congo ang pagbuto sa makamatay nga sakit nga Ebola, diin natala na ang moabot sa 246 ka impeksyon ug 65 ka indibidwal na ang nakabsan sa kinabuhi.
Base sa taho gikan sa Africa Centers for Disease Control and Prevention (Africa CDC), makaplagan ang kadaghanan sa mga namatay sa mga lungsod nga minahan og bulawan sa Mongwalu ug Rwampara nga nahimutang sa probinsya sa Ituri.
Gumikan sa maong sitwasyon, nagpasiugda og pangtigom ang ahensya uban sa mga silingang nasud sama sa Uganda ug South Sudan, lakip na ang mga internasyonal nga kaabag, aron hisgutan ang mga dinalian nga lakang sama sa cross-border surveillance ug dinaliang pagtubag sa krisis.
Kahinumduman nga ang Ebola unang namatikdan niadtong tuig 1976 sa maong nasud, ug giingong nagsugod ang virus gikan sa mga kabog.
Base sa taho, kini na ang ika-17 nga higayon nga miatake ug natala ang maong delikado nga epidemya sa nasud sa Congo.