MARAMAG, BUKIDNON — Pormal nang nangandam ang Central Mindanao University (CMU) sa pagpasaka og sunod-sunod nga kasong kriminal batok sa grupong Buffalo-Tamaraw-Limus (BTL) dungan sa pagbutyag nga adunay mga dagkong negosyante ang giingong nagpaluyo niining dakong panagbangi sa yuta.
Sa pamahayag ni Atty. Jeoffrey Sayson, legal counsel sa CMU, kompleto na ang mga affidavit alang sa pagpasaka og mga kasong indirect contempt of court, malicious mischief, grave coercion, ug grave threats. Kini human matod pa gipangharass ug gibaharan ang kinabuhi sa mga opisyal ug empleyado sa unibersidad, lakip na ang pagbabag sa mga trabahante samtang nagpahigayon og seed production sa maong dapit.
Samtang, gibutyag ni CMU President Dr. Rolito Eballe nga base sa ilang nakuptang mga dokumento o Deed of Undertaking, migawas ang mga pangalan sa pipila ka prominenteng negosyante gikan sa Valencia City ug lungsod sa Quezon nga nalambigit sa ilegal nga “prinda-prinda system” sa maong yuta. Gieskrutinize na kini karon sa ilang legal team aron hingpit nga mapanalipdan ang kabatanduan ug mandato sa eskwelahan sa edukasyon ug panukiduki.