Bus sa Pakistan nahulog sa pangpang, 32 patay! 

Nakalas ang 32 ka kinabuhi samtang 16 pa ang samaron human nahulog sa lawom nga pangpang ang usa ka pampasahero nga bus sa habagatang-kasadpan sa Pakistan.

Ang aksidente nahitabo sa Dana Sar mountain range, dapit sa utlanan sa Balochistan ug Khyber Pakhtunkhwa, samtang ang bus nagbiyahe gikan sa Quetta paingon sa Peshawar mga alas 8 sa buntag (oras sa Pakistan).

Sumala sa mga opisyal, adunay 48 ka pasahero ang sakay sa bus lakip na ang mga babaye ug mga bata.

Gituohang problema sa manibela maoy posibleng hinungdan sa pagkawala sa kontrol sa drayber sa wala pa mahulog ang sakyanan.

Sa pagkakaron, ang mga samaron gidala na sa District Headquarters Hospital sa Zhob samtang padayon pa ang imbestigasyon sa insidente.