Gipasidaan sa usa ka registered psychometrist ang posibleng seryosong epekto sa bullying sa mga bata, ilabi na kung dili dayon matagad ang ilang kahimtang ug mga hinungdan sa ilang kasinatian.
Matud ni Stella Ferrarez, ang bullying mahimong verbal, physical, psychological o online, ug kasagarang makapa depress sa nalambigit niini nga mosangpot sa pagpasakit sa kaugalingon o sa ubang tawo.
Gipasabot niya nga ang pinakagrabeng epekto sa bullying sa biktima mao ang depression nga mahimong mosangpot sa suicidal thoughts o suicide.
Samtang, iyang gilain ang bullying sa child abuse, diin ang bullying kasagarang mahitabo tali sa bata ngadto sa laing bata, samtang kung adult na ang nakapasakit sa usa ka menor de edad, mahimo na kining ikonsiderar nga child abuse.
Gipatin-aw usab ni Ferrarez nga importante ang hustong paggamit sa termino nga bullying tungod kay lahi ang legal nga pagtan-aw niini kung adult ang nalambigit.
Matud pa niya, ang mga bata nga mahimong bully usahay adunay kasinatian sa pag-abuso, kakulang sa emotional support, o kalisod sa pagpahayag sa ilang gibati.
Samtang ang mga biktima sa bullying kasagarang mga bata nga hilomon, dili makasukol, o adunay kalisod sa pag-assert sa ilang kaugalingon.
Giduso usab niya ang mga ginikanan, magtutudlo ug eskwelahan nga mas sabton ang hinungdan sa pamatasan sa bata imbes nga performance lamang ang tutukan.