Nag-andam na og resolusyon ang Sangguniang Panlungsod sa Malaybalay City aron hangyoon ang Department of Public Works and Highways (DPWH) nga ilisan og tulay ang box culvert sa Barangay Dalwangan, human kini magpahinabo og pagbaha sa maong dapit.
Sa pakighinabi sa Bombo Radyo Malaybalay kang City Councilor Jayson Chad Ayala, iyang gipadayag nga gamay ra ang kapasidad sa maong box culvert kumpara sa kusog nga pag-agos sa tubig gikan sa suba, hinungdan nga kinahanglan na kini nga ilisan og tulay isip dugay nga solusyon.
Gisuportahan kini sa pahayag sa tag-iya sa Westland Flower Farm nga si Junrey Ruiz Perales, diin gibanabanang kapin sa ₱5 milyones ang kadaot nga gibiyaan sa pagbaha—lakip ang ₱2 milyon sa greenhouse ug ₱3 milyon nga nawalang bili sa mga bulak nga nakawala usab sa panginabuhian sa kapin 15 ka pamilya sa iyang mga trabahante. Gipahayag usab ni Perales nga wala sila nakonsulta sa kontraktor sa wala pa gi-instalar ang maong proyekto.
Samtang nagpaabot sa aksyon ug pondo gikan sa DPWH, temporaryong ipahigayon sa City Engineering Office ang desilting o pagkuha sa napundo nga lapok ug balas sa suba, habang gipangandaman na usab sa lokal nga panggamhanan ang paghatag og tabang sa mga apektadong pamilya ug mag-uuma.