Nagpakitabang karon si Jonil C. Menesterio sa publiko ug kapulisan human gikarnap ang motorsiklo niini sulod mismo sa compound sa Immaculate Conception Parish Church sa Manolo Fortich, Bukidnon niadtong buntag sa Dominggo, Mayo 24, 2026.
Sumala sa asoy sa biktima, gidala sa iyang amahan ang maong unit kuyog ang iyang manghod aron unta ipa-blessing human sa misa, apan kalit lang kining nahanaw sa parkinganan sa wala pa kini makuha sa iyang manghod.
Base sa inisyal nga imbestigasyon, gituohang duha ka suspek ang responsable sa pagpangawat diin usa ang nagsilbing lookout ug ang usa ang mipadagan sa motor, usa ka hitabo nga nasaksihan mismo sa pari sa maong simbahan.
Nasuta sa CCTV footage nga gitulod una sa mga kawatan ang motorsiklo padulong sa gawas sa compound sa wala pa kini gipadagan, hinungdan nga naputol na ang ilang track.
Tungod niini, nanawagan ang biktima sa si bisan kinsa nga adunay impormasyon o nakakita sa iyang sakyanan nga makig-alayon dayon sa mga otoridad aron sa daling pag-recover niini ug pagkasikop sa mga suspek.