Nakapukaw sa dakong interes sa mga turista ang usa ka lapyahan sa lungsod sa Trieste, Italy tungod sa pagpatuman niini og talagsaong patakaran diin hingpit nga gibulag ang dapit alang sa mga lalaki ug babaye pinaagi sa usa ka konkretong paril.
Ang maong lapyahan nga nailang “El Pedocin” (o Spiaggia di Lanterna) mao na lang ang nag-inusarang beach sa tibuok Europa nga nagpabilin sa maong tradisyon sukad pa niadtong tuig 1903, sa panahon sa pagmando sa Austro-Hungarian. Ang maong paril nag-babag gikan sa baybayon hangtod ngadto sa lawod sa dagat aron maseguro nga dili magkakitaay ang mga kalalakin-an ug kababayen-an samtang nangaaligo.
Bisan pa man og giisip kini nga karaan sa modernong panahon, paborito gihapon kini sa mga lokal nga residente ug mga kababayen-an tungod sa gihatag niining pribasidad, kasiguruhan, ug kalinaw—hilabi na sa mga inahan ug mga katigulangan. Sa baratong pulta o entrance fee nga ubos sa duha ka euro, padayon gihapon kining ginadagsa sa liboan ka mga tawo matag ting-init.