Usa ka makalilisang nga aksidente sa kadalanan sa Maramag, Bukidnon ang mikalas sa kinabuhi sa usa ka batan-ong driver sa motorsiklo human kini nabangga sa usa ka nakaparadang trailer truck.
Nahitabo ang trahedya niadtong Nobyembre 22, 2026, mga alas 3:00 sa kaadlawon, didto sa Sayre Highway, KM-6, Base Camp, Maramag, Bukidnon.
Ang unang sakyanan nga nalambigit mao ang usa ka puti nga FAW trailer truck, nga nagdala sa Plate No. 101205, gimaneho sa usa ka 42-anyos nga lalaki gikan sa Pangantucan, Bukidnon, kinsa usa ka Professional Driver’s License holder.
Samtang ang ikaduhang sakyanan mao ang usa ka itom ug pula nga Kawasaki Bajaj motorcycle, Plate No. K863 D, gimaneho sa usa ka 20-anyos nga lalaki nga residente sa P-11, Base Camp, Maramag, Bukidnon, kinsa walay driver’s license ug walay helmet.
Sa inisyal nga imbestigasyon, nasuta nga ang trailer truck nagparka daplin sa karsada, nag-atubang sa kasadpan, sa dihang nahitabo ang insidente.
Ang motorsiklo, gikan sa Kalagutay, Base Camp, Maramag, Bukidnon padulong sa P-11, Base Camp, Maramag, Bukidnon, nagdagan sa outer lane sa hilabihan ka kusog nga dagan.
Pag-abot sa dapit nga nahitaboan, ang driver sa motorsiklo, tungod sa iyang sobrang kakusog, nawad-an sa kontrol ug wala na makapugong sa iyang motorsiklo, hinungdan nga kini mibangga sa likod nga bahin sa nakaparadang trailer truck.
Tungod sa kakusog sa impact, ang motorsiklo napasok ilawom sa trailer truck, ug naipit ang driver niini.
Ang driver sa motorsiklo nakaangkon og grabeng mga samad ug gidala dayon sa rescue team sa Bukidnon Provincial Hospital-Maramag alang sa medikal nga pagtambal, apan gideklarar nga Dead On Arrival (DOA) sa attending physician.
Ang trailer truck nakaangkon og kadaot sa likod nga bahin niini, samtang ang motorsiklo grabeng naguba, ug ang duha ka sakyanan gidala sa Maramag MPS alang sa tukmang disposisyon.
Agi og tubag sa trahedya, gimando dayon sa Provincial Director sa Maramag MPS ang estriktong pagpatuman sa mga balaod sa trapiko.
Gipasidan-an usab niya ang pagpahigayon og random checkpoints aron masiguro ang kaluwasan sa tanang motorista sa kadalanan.
Giawhag usab niya ang tanang driver nga magbaton og responsableng kinaiya ug mag-amping pag-ayo sa pagmaneho, ingon man ang pagkooperar sa mga awtoridad bahin sa mga lagda ug polisiya sa kaluwasan sa dalan.

