Miapela si Grace Nancy dela Rosa, asawa ni Senador Ronald “Bato” dela Rosa, ngadto sa hudikatura sa Pilipinas nga dili mahimong instrumento sa pagpadala sa iyang bana ngadto sa The Hague, Netherlands.
Kini taliwala sa padayong pagpangita sa mga otoridad kang Senador dela Rosa human magpagawas og warrant of arrest ang International Criminal Court o ICC kabahin sa kontrobersyal nga war on drugs.
Sa statement niini karong Lunes, Mayo 25, gipasiugda ni Nancy dela Rosa nga ang matag Pilipino kinahanglan husayon ubos sa kaugalingong hudikatura sa nasud ug dili sa langyawng korte.
Matud ni Grace, ang boluntaryong pagtugyan sa gobyerno sa usa ka Pilipino ngadto sa internasyonal nga korte usa ka pag-angkon nga huyang ug walay kapasidad ang hustisya sa Pilipinas.
Gipasiugda usab niya nga ang kaso sa iyang bana gipadako lamang tungod sa politika. Sumala pa niya, wala na silay igong panahon sa paghulat sa teknikal nga argumento ug debate, gumikan matag higayon nga walay desisyon, mas nagkaduol ang mga otoridad kang Senador Bato.
Dugang ni Nancy dela Rosa, kung adunay leksyon nga makat-unan gikan sa kaso ni kanhing Pangulong Rodrigo Duterte, kini mao ang dili pagtugyan pag-usab sa laing Pilipino ngadto sa langyawng korte.
Mihangyo usab siya sa hudikatura nga panalipdan ang soberanong katungod sa nasud ug dili isalikway ang responsibilidad alang sa katawhang Pilipino, gumikan ang ilang desisyon mahinumduman sa kasaysayan.