Argentina, misulod na sa quarterfinals sa FIFA World Cup 2026 human makabawi batok sa Egypt, 3-2 Misulod na sa quarterfinals ang defending champion nga Argentina human makabawi ug mapildi ang Egypt, 3-2, sa ilang Round of 16 nga dula sa FIFA World Cup 2026.
Halos mapukan na ang Argentina human maulahi og 2-0, apan nakahimo kini og impresibong comeback pinaagi sa tulo ka sunod-sunod nga goal sulod sa kapin 13 minutos.
Ang Egypt ang unang nakapuntos sa ika-15 nga minuto pinaagi kang Yasser Ibrahim. Sa ika-20 nga minuto, napakyas usab si Lionel Messi sa penalty kick human kini nasagang sa goalkeeper sa Egypt.
Sa pagsugod sa ikaduhang hugna, adunay usa pa goal si Mostafa Zico apan wala kini giisip human sa VAR review nga nakit-an nga adunay foul sa wala pa ang goal.
Bisan pa niana, nakapuntos gihapon si Zico sa ika-67 nga minuto aron mapalapad ang labaw sa Egypt sa 2-0.
Apan wala mouyon ang Argentina sa kapildihan. Sa ika-79 nga minuto, nakapamuntos si Christian Romero pinaagi sa usa ka header aron mapakunhod ang kalabwan sa Egypt.
Gisundan dayon kini ni Lionel Messi sa ika-83 nga minuto aron patas ang iskor sa 2-2. Sa ikaduhang minuto sa stoppage time, giselyohan ni Enzo Fernandez ang kadaugan sa Argentina pinaagi sa usa ka game-winning header nga naghatag kanila sa 3-2 nga kadaugan.