Narekober sa all-female-led Special Forces team sa Philippine Army ang upat ka high-powered firearms gikan sa arms cache sa New People’s Army sa Sitio Bendum, Brgy. Busdi, Malaybalay City, Bukidnon niadtong milabayng adlaw.
Ang operasyon gipangulohan ni Cristy B. Timtim, lider sa Team “Maya,” nga naglangkob sa mga babayeng opisyal ug personnel gikan sa 1st Special Forces Battalion ubos sa 4th Infantry Division.
Nakuha sa maong operasyon ang duha ka CZ 858 tactical rifles, usa ka M14 rifle, usa ka M4 carbine rifle, ug spare barrel sa M16 rifle.
Sumala sa grupo, nahimo ang operasyon base sa impormasyon gikan sa mga concerned citizens kabahin sa lokasyon sa arms cache sa Pantaron Mountain Range.
Sa laing kalamboan, duha ka miyembro sa NPA ang misurender ngadto sa usa ka female intelligence officer sa Bayugan City, Agusan del Sur sa maong adlaw.
Samtang niadtong Abril 9, usa pa ka rebelde ang mitugyan sa iyang armas ngadto sa 58th Infantry Battalion sa Claveria, Misamis Oriental.
Gipasidunggan ni Michele B. Anayron Jr. ang maong managlahing kalampusan sa mga babayeng lider sa operasyon, nga nagpakita sa ilang lig-on nga papel sa pagpalig-on sa kalinaw sa mga lugar nga apektado sa kagubot.