Walay hunong sa paglutos ang banay sa militar sa mga nahibiling miyembro sa walhong grupo sa nganhi na ning lalawigan sa Bukidnon.
Kini ang gibutyag ni BGen. Siegfred C. Tubalado- Commander sa 403rd Infantry Peacemaker Brigade Philippine Army.
Gipaambit sa opisyal nga 12 na lamang ka rebelde ang padayon pang ginagukod human adunay pipila ka miyembro nga mitahan ning mga milabayng semana tungod sa kagutom ug kalisod sa pagtago sa kabukiran.
Lakip sa nahibiling lider ang giingong top rebel leader nga si Julia Cagadas alias “Ka Joca.”
Apan matud sa opisyal, bisan pa og labing tinguha sa militar nga mapukan ang banay sa walhong pundok, nagpabiling andam ang militar sa pagdawat sa mga indibidwal nga buot mubalik sa sabakan sa gobyerno.
Dugang pa niini nga nga dili pa ideklarar sa militar nga insurgency-free ang Bukidnon hangtod nga makumpirma nga wala na’y armadong grupo nga naglihok sa kabukiran.
Samtang, padayon usab ang militar nga nanawagan sa mga rebelde nga mukanaog ug mosurender, diin andam ang gobyerno sa pagdawat kanila pinaagi sa Enhanced Comprehensive Local Integration Program o ECLIP nga naghatag og pinansyal nga tabang, livelihood support ug bayad alang sa mga armas nga isurender.