Milagda sa partial report sa Senate Blue Ribbon Committee ang upat lamang ka senador, ang maong report may kalabotan sa imbestigasyon sa giingong anomalya sa flood control projects.
Sumala ni Senate President Pro Tempore Panfilo “Ping” Lacson ug chairman sa komite, gawas kaniya milagda usab sa draft report sila Risa Hontiveros, Francis Pangilinan ug Bam Aquino.
Ang maong draft report gipanghatag sa mga senador niadtong Pebrero 11.
Kung makompleto ang pirma sa mayorya sa komite o siyam ka senador, ipresentar ang report sa plenaryo sa Senado diin kini pagadebatehan sa dili pa pormal nga aprobahan.
Tungod niini, nanawagan si Lacson sa ubang miyembro sa komite nga basahon ug pirmahan ang report aron madala na kini sa plenaryo.
Ang Senate Blue Ribbon Committee naglangkob sa 17 ka senador, lakip sila Erwin Tulfo, JV Ejercito, Pia Cayetano, Sherwin Gatchalian, Lito Lapid, Loren Legarda, Raffy Tulfo, Mark Villar, Joel Villanueva, Rodante Marcoleta, Robin Padilla, Jinggoy Estrada, Bong Go ug Imee Marcos.
Samtang, klarong gipahayag ni Senador Rodante Marcoleta nga dili siya mopirma sa partial report, gumikan nagduhaduha siya sa nagpadayon nga imbestigasyon sa komite.
Kahinumduman nga adunay init nga diskusyon sa plenaryo sa Senado tali nila ni Lacson human gisaway ni Marcoleta ang komite nga wala pa’y kompleto nga report ug wala usab matud pa kini pirma ni Lacson sa dokumento nga iyang nadawat.
Apan gipasabot ni Lacson nga 20 ka hard copies sa report ang gipanghatag ug lahi ang pahina para sa pirma.
Dugang pa niini, nga gipahibalo na sa mga staff sa mga senador nga anaa sa iyang opisina ang hard copy nga adunay iyang pirma.
Samtang, kung makompleto na ang mga pirma, gilauman nga ipresentar sa plenaryo sa Senado ang report nga nagrekomenda og mas lawom nga imbestigasyon batok sa pipila ka indibidwal, lakip ang ubang taas nga opisyal sa gobyerno nga giingong nalambigit sa mga kwestiyonableng flood control projects.