Gisugdan na sa Department of Education (DepEd) ang upat ka adlaw nga onsite workweek alang sa mga non-teaching personnel sugod Lunes, Marso 9, 2026.
Ubos sa memorandum ni Secretary Sonny Angara, himoon na nga work-from-home ang adlawng Biyernes subay sa direktiba ni Presidente Marcos Jr. sa pagdaginot sa enerhiya taliwala sa krisis sa lana.
Lakip na niini ang mga regular, contract-of-service, ug job order nga mga empleyado, samtang ang mga magtutudlo magpadayon sa ilang naandan nga klase sa tunghaan.
Tumong usab sa DepEd nga mapa-ubsan ang konsumo sa kuryente ug gasolina og 10% ngadto sa 20%.
Tungod niini, gimando ang pag-set sa aircon sa 24°C, pagpalong sa mga suga ug electronics panahon sa lunch break, ug ang paggamit sa hagdan imbes nga elevator.
Gidasig usab ang pagpahigayon og mga meeting ug konsultasyon pinaagi sa virtual platforms o online na lamang aron mamenusan ang gasto sa opisyal nga pagbiyahe.