Gisusi karon sa mga otoridad ang posibleng intensyon sa usa ka lango nga lalaki nga kalit lang misulod sa balay sa Bise Mayor sa lungsod sa Cabanglasan nga si Hon. Renante Inocando, sa Purok 10, Poblacion, pasado alas 11:05 niadtong gabie Mayo 11, 2025.
Gituohan nga adunay posibleng motibo ang suspek nga si alyas “Romeo”, 59 anyos, residente sa Purok 8 sa samang barangay, nga gitumbok nga nisupak sa COMELEC liquor ban ug sa kasamtangang election gun and security rules. Matod pa sa imbestigasyon, walay pagtugot nga misulod si Romeo sa panimalay sa kandidato, ug misuway pa og istorya kang Inocando, nga sa pagkakaron midagan usab pagka-mayor sa maong lungsod.
Giingong nagpugos kini nga makigkita sa bise mayor ug miingon nga konektado siya sa laing kandidato. Gikonsiderar sa mga otoridad ang posibilidad nga kini usa ka porma sa panghasi o pailawom nga hulga sa kandidato atol sa eleksyon. Bisan pa sa kahimtang sa suspek nga lango, gikuhaan gihapon kini og statement samtang gitanggong na sa custodial facility sa Cabanglasan MPS.
Ang insidente nagpahimangno sa katawhan nga posible masinati sa mga lokal nga opisyales ug kandidato. Sa pagkakaron, gipasaka na ang mga kaso batok sa suspek ilawom sa Qualified Trespass to Dwelling ug kalapasan sa liquor ban sa COMELEC. Gipalig-on na karon sa kapulisan ang seguridad sa palibot sa mga kandidato ug ilang mga panimalay, ilabi na sa mga hotspot nga lugar samtang nagpadayon ang eleksyon.