Miabot na sa United States si Presidente Ferdinand Marcos Jr. alang sa usa ka working visit. Magpabilin ang Pangulo sa New York hangtod Miyerkules, Marso 11, 2026.
Kuyog niini sa biyahe si First Lady Liza Marcos ug pipila ka miyembro sa iyang gabinete.
Sumala ni Asec. Angelica Escalona, tigpamaba sa Department of Foreign Affairs, lakip sa mga aktibidad sa Pangulo ang high-level engagements sa United Nations diin manawagan kini og pagpugong (restraint) sa mga nasod nga apil sa gubat sa Middle East ug pagbalik sa negotiating table.
Manawagan usab ang Pangulo nga respetohon ang international law ug ang UN Charter taliwala sa nagpadayon nga panagbangi sa maong rehiyon.
Apil usab sa iskedyul sa Pangulo ang pag-apil sa opening sa ika-70 nga sesyon sa UN Commission on the Status of Women.
Gikatakda usab nga makigpulong ang Pangulo kang Antonio Guterres, Secretary-General sa United Nations, aron hisgutan ang nagpadayon nga tensyon sa Middle East.
Sa pikas bahin, sa pangutana kung pagahisgutan ba sa Pangulo ang isyu sa West Philippine Sea, mitubag si Asec. Angelica Escalona nga siguradong hisgutan ang mga panghitabo sa internasyonal ug rehiyonal, lakip na ang mga isyu nga posibleng makaapekto sa mga Pilipino.