Gibarugan gan si kanhing Senator Antonio Trillanes IV nga dili niini hunongan ang pakigkomunikar sa mga opisyal sa International Criminal Court (ICC) bisan pa sa mga akusasyon nga giatubang niya.
Ang pakig-konekta niini sa international tribunal may kalabotan sa kaso ni kanhing Presidente Rodrigo Duterte, nga karon nakaditine sa The Hague, Netherlands, tungod sa kasong Crimes Against Humanity.
Sumala ni Trillanes nga padayon siya sa pagtabang sa kaso hangtod kini matapos o hangtod masentensiyahan si Duterte, ilabi nga libuan ang napatay sa administrasyon ni Duterte samtang siya pa ang Presidente.
Giinsistir ni Trillanes nga daghang saksi ang makapamatuod sa nahitabo sa panahon sa pagdumala ni Duterte.
Gisundan usab kini ni Trillanes sa pagpasa niya og reklamo batok sa 18 ka ex-Marines ug uban pang personalidad nga miakusar kaniya nga giingong nakadawat siya og 2 milyones ka dolyar aron asikasuhon ang operasyon sa ICC sa Pilipinas.
Gihimakak ni Trillanes ang akusasyon ug giingon nga kini usa lang ka paagi sa pamilya Duterte nga ilikay ang atensyon gikan sa kaso batok sa kanhing Presidente.
Dugang pa niini, nga magpadayon siya sa pag-file og reklamo sa cyber libel ug perjury batok sa mga ex-Marines ug kakunsabo niini tungod sa malicious imputation nga giingong nakadawat siya og kwarta.
Matud ni Trillanes, nga kinahanglan nga isulti sa mga ex-Marines ang tinuod ug dili manipulado ang mga impormasyon kay adunay konsekensya kung magbakak sila.
Samtang, nagpasaka usab og reklamo si National Security Adviser Eduardo Año batok sa maong grupo sa Department of Justice, ug giingon nga padayon nilang gakdon ang mga 18 ka ex-Marines ug uban pang kakunsabo aron mapanubag sa balaod.