Naitala sa Bureau of Fire Protection o BFP Bukidnon ang 16 ka insidente sa sunog sa nagkadaiyang lugar sa probinsya sa bulan sa Pebrero, nga nagbilin og kapin 600 mil pesos nga damyos, sumala ni SFO1 Marvin G. Talibong, OIC sa Intelligence and Investigation Section sa BFP Bukidnon.
Matud ni Talibong, 12 sa maong mga insidente residential fires, samtang adunay usa ka storage fire, usa ka vehicular fire, ug uban pang sunog nga may kalabotan gihapon sa mga kabalayan.
Gipasabot sa opisyal nga kasagaran hinungdan sa sunog ang nabiyaang electrical appliances, base sa mga report nga nadawat sa ilang buhatan.
Samtang sa bulan sa Marso gikan Marso 1 hangtod karon, naka-record na usab ang BFP og pito ka sunog sa mga lugar sama sa Valencia City, Impasugong ug Libona, nga adunay kapin 200 mil pesos nga damyos. Sa maong pito ka insidente, lima ang residential, usa ka vehicular ug usa ka industrial fire, samtang ang ubang kaso padayon pang gi-imbestigahan sa mga otoridad.
Dugang pa ni Talibong nga padayon ang ilang mga aktibidad isip kabahin sa Fire Prevention Month karong Marso, lakip ang motorcade, information drive, ug pagdeploy sa mga fire truck sa nagkadaiyang building areas aron mapalig-on ang kahanduraw sa publiko batok sa sunog.
Sa katapusan, gipahimangnoan sa BFP ang mga residente sa Bukidnon nga sigurohong mapalong ug ma-check ang mga electrical appliances, gasul ug koneksyon sa kuryente sa dili pa mobiya sa panimalay aron malikayan ang posibleng sunog.