Nadakpan ang 298 ka indibidwal sulod sa 362 ka nagkadaiyang operasyon nga gipahigayon sa kapulisan sa tibuok lalawigan sa Bukidnon sa bulan sa Pebrero 2026, sumala ni Bukidnon Police Provincial Office Spokesperson PCpt. Sheila Joy P. Jangad.
Matud ni Jangad, lakip sa mga operasyon ang 56 ka anti-illegal drugs operations diin nakumpiskar ang 304.433 gramos nga shabu ug marijuana nga adunay gibanabang street value nga mokabat sa 2,273,876 pesos.
Nakapahigayon usab ang kapulisan og walo ka operasyon batok sa illegal gambling nga misangpot sa 12 ka arestado, 62 ka operasyon batok sa loose firearms nga adunay 14 ka nadakpan, ug lima ka operasyon alang sa recovery sa mga motor vehicle.
Narekord usab ang 34 ka operasyon batok sa illegal logging nga adunay 21 ka nadakpan, 39 ka operasyon batok sa illegal fishing nga misangpot sa 29 ka arestado, samtang 13 ka most wanted persons ug 67 ka other wanted persons ang nadakpan sa nagkadaiyang operasyon.
Dugang pa, nakapahigayon usab og 56 ka operasyon batok sa smuggled cigarettes nga misangpot sa 61 ka nadakpan.
Sumala pa sa opisyal, ang pagtaas sa gidaghanon sa nadakpan nagpakita sa mas gipakusog nga operasyon sa kapulisan aron mapadayon ang kalinaw ug kahapsay sa probinsya.
Sa pagkakaron, padayon gihapon ang mga operasyon sa kapulisan sa Bukidnon batok sa illegal drugs, illegal logging, smuggled cigarettes ug sa pagdakop sa mga most wanted ug ubang wanted persons sa lalawigan.