Gikwestyon ni Senador Rodante Marcoleta ang proseso sa pagtubag sa Department of Migrant Workers kon DMW sa repatriation o pagpauli sa mga Overseas Filipino Workers kon OFWs nga buot makauli sa Pilipinas gikan sa Tungang Sidlakan tungod sa nagpadayon nga tensyon sa rehiyon.
Matud ni Leo Hans Cacdac, DMW Secretary, sa 1,416 ka OFWs nga nangayo ug tabang aron makauli, gikatahong adunay dul-an sa 60 pa lamang ang nakauli sa Pilipinas sa pagkakaron.
Gumikan niini, giduso ni Marcoleta nga gikinahanglang hingusgan sa DMW ang mga lakang niini aron mapadali ang pagpauli sa mga Pilipino nga gustong mopauli gikan sa Middle East.
Gitataw sa senador nga wala pa moabot ang worst-case scenario diin posibleng mas daghang OFWs ang gustong mamauli kung mograbe ang tensyon sa rehiyon, hinungdan nga importante nga mas andam ang gobyerno sa maong sitwasyon.
Gipasabot usab ni Cacdac, nga naglisod ang ahensya sa pagpatuman sa repatriation operations tungod sirado o limitado ang airspace sa pipila ka mga apektadong nasud sa Middle East, hinungdan nga kinahanglan nga mangita og alternatibong mga rota ug mas luwas nga pamaagi sa pagpauli sa mga OFW sa Pilipinas.
Gipasalig usab sa Secretary nga gihimo sa DMW ang tanan nga mga lakang aron masiguro ang luwas nga pagbalik sa mga Pilipino sa nasud bisan pa sa mga hagit sa kasamtangang kahimtang sa rehiyon.