Mipadayag si House Speaker “Bojie” Dy III nga uyon kini nga amyendahan ang balaod aron mapaubsan ang buhis sa lana sa nasod.
Kini nga lakang maoy tubag sa tinguha ni Presidente Ferdinand Marcos Jr. nga makig-estorya sa liderato sa Kamara ug Senado aron mahatagan kini og gahom sa pagpaubos sa buhis isip panalipod sa mga lungsoranon batok sa epekto sa pagsaka sa presyo sa lana sa merkado sa kalibutan.
Sumala pa ni Dy, kon molapas na sa $80 matag bariles ang presyo sa Dubai crude, sigurado nga maigo gyud ang pletehan, presyo sa pagkaon, ug uban pang batakang palitonon sa nasod.
Tungod niini, andam ang Kamara nga makig-alayon sa Senado aron tun-an ug usbon ang balaod kon gikinahanglan, aron mahatagan ang Presidente og awtoridad nga mopakunhod sa excise tax sa panahon sa pagsaka sa presyo sa lana.
Gawas niini, gisuportahan usab ni Dy ang panawagan sa pagdaginot sa kuryente sa tanang ahensya sa gobyerno tungod sa nagpadayong tensyon sa Middle East.