Pormal nga giaprobahan sa House Committee on Justice ang pagbawi sa ikaduhang impeachment complaint nga gipasa sa grupong Tindig Pilipinas batok kang Vice President Sara Duterte, atol sa deliberasyon ning adlaw’ng Lunes, Marso 2, 2026.
Sumala sa Tindig Pilipinas, nadesisyonan ang pagbawi sa ikaduhang reklamo human gipadayag nga tutukan na lamang ang ikatulong impeachment complaint gumikan halos pareho matud pa ang sulod ug alegasyon sa unang gipasa nga reklamo.
Tumong niini, ang paglikay sa pagdoble sa mga isyu ug pagpalig-on sa pagsusi sa komita.
Dungan niini, giatras usab ni Leila de Lima, representante sa Mamamayang Liberal Party-list, ug ni Perci Cendaña, representante sa Akbayan Party-list, ang endorsement sa maong ikaduhang impeachment complaint, sumala sa pormal nga pamahayag sa duha ka mambabalaod.
Giklaro usab ni De Lima, nga ang pagbawi dili timailhan sa pagsurrender apan gusto lamang matud sa complainants nga mapadali ang proseos aron hingpit na nga ma-impeach ang bise-Presidente.
Gipadayag usab sa House Committee on Justice nga ang pag-apruba sa pagbawi usa ka pormal nga lakang sumala sa balaod ug internal nga mga lagda sa Kamara.
Magpadayon gihapon ang komite sa paghusay sa nahibiling impeachment complaints base sa mga ebidensya ug sa mandato sa Konstitusyon.
Samtang gideklarar sa House Committee on Justice ang ikatulo ug ikaupat nga impeachment complaints batok kang Bise Pres. Sara Duterte “sufficient in form.”
Ang ikatulong reklamo gipasaka sa religious leaders samtang ang ika-upat nga complaint gipasaka ni Atty. Nathaniel Cabrera.
Sunod nga hisgutan sa Komite ang pagtino kung ang mga reklamo “sufficient in substance.”
Magpadayon ang deliberasyon ugmang adlawa, Marso 3, 2026.