Tila bilang na ang mga oras sa Administrasyong Marcos. Kini ang gipahayag ni kanhi Presidential Chief Legal Counsel Atty. Salvador Panelo human mitumaw ang serye sa mga kontrobersiya nga nagtay-og sa Palasyo.
Ang maong pamahayag naggumikan sa pagbulgar sa giingong pipila ka mga nagpailang sundalo ug marino nga nag-ingon sa giingong paghatud og bilyun-bilyong pisong kantidad sa salapi ngadto sa pipila ka taas nga opisyal sa gobyerno.
Gilambigit sa maong pasangil sila si kanhi Senador Antonio Trillanes IV ug si Presidente Ferdinand “Bongbong” Marcos Jr. Matud ni Atty. Panelo, grabi ka detalyado ang mga testimoniya sa mga nagpailang sundalo para matawag lang nga usa ka bakak.
Daling gipanghimakak sa Malacañang ang maong mga alegasyon ug miingon nga wala gayud nakadawat og “kickback” ang Presidente. Hugot usab nga gihimakak ni Trillanes ang maong mga pasangil batok kaniya.
Dungan niini, didto sa The Hague, Netherlands, maisugon usab nga gidepensahan ni kanhi Executive Secretary Atty. Salvador Medialdea ang madugong war on drugs sa administrasyong Duterte. Sa usa ka interbyu, gibarugan ni Medialdea nga kini ang “katapusang paagi” aron tapuson ang droga ug kriminalidad sa nasud.