Hugot nga gipanghimakak ni kanhi Senador Antonio Trillanes IV ang alegasyon nga midawat siya og $2 milyones gikan kang kanhi Kongresista Zaldy Co aron gamiton sa imbestigasyon sa International Criminal Court (ICC) batok kang kanhi Presidente Rodrigo Duterte.
Ang pasangil migawas sa press conference sa 18 ka nagpakilalang kanhing Philippine Marines, kinsa nag-angkon sa affidavit nga sila’y nagdala og duha ka maleta nga adunay tig-₱56 milyones o katumbas sa $2M ug gihatod kang Trillanes. Giingon usab nga siya maoy nisagot sa gasto sa hotel, pagkaon ug sakyanan sa ICC investigators niadtong Disyembre 2023.
Gidugtong pa sa grupo ang alegasyon sa paghatod og ₱805 bilyon ngadto sa pipila ka politiko, lakip si Presidente Ferdinand Marcos Jr. ug kanhi House Speaker Martin Romualdez—mga pasangil nga una nang gipanghimakak sa Malacañang.
Mipahibalo si Trillanes nga magpasaka siya og cyber libel case batok sa mga nagpakaylap sa maong alegasyon.