Mipadayag sa baruganan si Sheerah Escudero, igsuon ni Ephraim Escudero, 18 anyos nga namatay kaniadtong 2017, nga gikaingong usa sa mga biktima sa duguong kampanya batok illegal nga droga.
Sa usa ka press conference, gibutyag nga padayon kining makadawat og mga negatibong mensahe gikan sa mga taga-suporta sa kanhi administrasyon, hilabina sa mga nagdepensa sa palisiya sa war on drugs.
Sumala sa pamahayag niini, gikinahanglan na ang lawom nga pagpamalandong sa publiko kung kinsa ug unsang klase sa pagdumala o administrasyon ang gisuportahan.
Gisaysay usab niini ang kasinatian sa pamilya mahitungod sa pagpatay sa igsuon niini, nga nagpabilin nga usa ka dakong kasakit ug pahinumdom sa mga epekto sa kampanya kontra droga.
Gilauman usab niini, nga ang International Criminal Court magpabiling mekanismo sa pagpanubag sa mga responsable sa mga gikaingong pag-abuso ug pagpamatay.
Dugang pa niini, dili na niini gusto nga adunay bisan kinsa sa pamilyang Duterte nga makabalik pa sa pwesto, tungod dili na matud pa niini gustong masinati sa laing mga pamilya ang susamang panghitabo.