Gisiguro sa Department of Justice (DOJ) nga dili maapektuhan ang resolusyon sa prosekusyon bahin sa mga reklamo batok sa Bise Presidente Sara Duterte bisan pa sa iyang plano nga modagan isip pangulo sa umaabot nga eleksyon.
Gibutyag ni Justice Spokesperson Atty. Polo Martinez nga walay epekto ang pagkandidato sa desisyon sa prosekusyon bahin sa mga reklamong sedisyon ug grave threats nga gisang-at batok kaniya.
Matud ni Martinez, bisan pa nag-anunsyo ni VP Sara sa iyang kandidatura, dili kini makausab sa proseso o assessment sa prosekusyon.
Parehas nga pagtratar ang buhaton sa DOJ bisan sa ubang indibidwal nga gustong modagan sa bisan unsang posisyon sa 2028 elections.
Sa pagkakaron, gisusi pa sa Division Head of Prosecutors ang status sa mga reklamo, nagtan-aw pa sa draft resolution kung kini ipasaka isip kaso o ibasura.
Ang NBI ang nag-file sa mga reklamo niadtong 2025, nga may kalabotan sa pahayag sa Bise Presidente bahin sa pagkuha og “hitman” alang sa hulga nga pagpatay ni Presidente Ferdinand “Bongbong” Marcos Jr., First Lady Liza Araneta-Marcos, ug kanhing House Speaker Martin Romualdez kung muabot ang panahon nga siya mapatay.
Apan, wala pa’y klarong petsa ang DOJ kung kanus-a ipagawas ang final nga resolusyon sa mga reklamo batok sa Bise Presidente.