Gitawag ni Bienvenido Abante Jr. ang affidavit sa detainee nga si Ramil Madriaga nga gikaingong bagman ni bise-Presidente Sara Duterte isip “smoking gun” kon pinakalig-on nga ebidensya sa ika-upat nga impeachment complaint batok sa Bise Presidente.
Matud ni Abante, bisan pa man nga parehas sa naunang mga reklamo ang mga akusasyon sama sa culpable violation of the Constitution, betrayal of public trust, graft and corruption ug bribery, mas bug-at ang kasamtangang reklamo tungod sa gipanumpaang affidavit ni Madriaga nga nagpakita matud pa sa suod nga koneksyon niini kang VP Sara.
Sumala pa ni Abante, andam si Madriaga nga motestigo ug gidasig kini nga barugan ang sulod sa affidavit, lakip ang alegasyon nga si VP Sara Duterte matud pa ang nagmugna sa grupong “Inday Sara Is My President” nga gikaingong gipondohan sa Philippine Offshore Gaming Operators kon POGOs ug sa mga drug lord.
Apan posible nga dili na imbitahan si Madriaga sa deliberasyon sa House Committee on Justice aron dili molungtad ang proseso, ug mas angay matud pa nga sa impeachment court na lamang kini mopadayag.
Samtang, hugot nga gihimakak ni VP Duterte ang bisan unsang kalambigitan niini kang Madriaga ug gipamatuod nga wala kini gihatag nga direktiba niini.