Nakatakdang mag-atbang sa usa ka exhibition bout ang duha ka boxing legends nga sila si Mike Tyson ug Floyd Mayweather Jr. karong Abril 25, 2026, didto sa Democratic Republic of Congo.
Sumala sa mga report, ipahigayon ang maong engkwentro sa siyudad sa Kinshasa, ang dapit nga nailhan tungod sa makasaysayang “Rumble in the Jungle” niadtong 1974 diin nag-abot sila si Muhammad Ali ug George Foreman.
Si Tyson, kinsa nag-edad na og 59, katapusang nakigsinumbagay niadtong Nobyembre 2024 batok sa YouTuber nga si Jake Paul diin siya napildi pinaagi sa unanimous decision. Samtang ang 48-anyos nga si Mayweather nagpabilin nga undefeated (50-0) ug katapusang ningsulod sa ring para sa usa ka exhibition match batok kang John Gotti III niadtong Agosto 2024.
Bisan pa man og unang gianunsyo ang maong plano niadtong Septyembre 2025, kumpirmado na karon nga madayon ang maong dula human mismo si Tyson niingon sa usa ka interview nga gidawat niya ang hagit ni Mayweather.