Mikabat sa 26 ka mga indibidwal ang nasikop sa kapulisan sa Bukidnon human sa gilusad nga sunod-sunod nga operasyon batok sa pagpamaligya og smuggled nga sigarilyo sa nagkalain-laing bahin sa probinsya.
Sa eksclusibong pakighinabi sa Bombo Radyo kay PCPT. Sheila Joy Jangad, tigpamaba sa Bukidnon Police Provincial Office (BukPPO), mukabat sa P112,640 ang kinatibuk-ang kantidad sa mga ilegal nga sigarilyo nga nakumpiska gikan sa 26 ka managlahing operasyon sa mga munisipyo ug siyudad sa Bukidnon.
Giklaro ni PCPT. Jangad nga ang operasyon sa kapulisan aron sumpoon ang pagkaylap sa mga sigarilyo nga walay “Graphic Health Warning” ug wala miagi sa saktong proseso sa buhis. Gihulagway usab sa opisyal nga ang maong ilegal nga buluhaton usa ka matang sa “economic sabotage” nga makadaot sa ekonomiya sa nasud.
Kasamtangan, ang kapulisan nakig-alayon na sa mga Local Government Units (LGU) ug Local Health Units (LHU) alang sa mas gipakusgan nga monitoring sa mga public markets.Ang tanang nakumpiskang ebidensya gitugyan na ngadto sa Bureau of Customs (BOC), kinsa mao nay gitahasan sa pagpasaka og saktong kaso batok sa mga dinakpan.