Gipahimangnoan sa aktres nga si Louise Delos Reyes sa publiko nga magpabiling mabinantayon ug mag-amping sa online transactions human usa sa myembro sa pamilya niini nabiktima sa usa ka online scam.
Gipadayag sa aktres, nga ang mga manlimbong nagpaka-representante sa usa ka iladong wellness resort ug migamit og peke nga social media account aron makapangayo og bayad.
Gipasabot ni Delos Reyes nga mas delikado hilabi na ang mga katigulangan nga kulang og kahibalo sa digital verification, hinungdan nga mas dali kini matarget sa mga scammer.
Nunot niini, gihangyo sa aktres ang mga matag pamilya nga aktibong motabang ug mogiya sa ginikanan ug katigulangan sa pag-ila sa lehitimong online accounts ug transaksyon, aron malikayan ang padayon nga pagdaghan sa mga kaso sa online scam sa nasud.