Mihangyo ang kanhi Senador Ramon “Bong” Revilla Jr. nga mag-inhibit o umatras si Sandiganbayan Associate Justice Karl Miranda sa pagdungog sa kaso sa malversation nga may kalabotan sa giingong ₱92.8-milyong ghost flood control project sa Pandi, Bulacan.
Nagpasaka ang kampo ni Revilla og urgent motion sa Sandiganbayan Third Division tungod sa giingong conflict of interest, gumikan si Justice Miranda igsoon sa abogado ni kanhi DPWH Secretary Roberto Bernardo, nga karon usa ka state witness ug posibleng motestigo batok kang Revilla.
Gitubag ni Justice Miranda ang mosyon ug klaro nga gikan pa sa sinugdan gisulti na niya ang iyang koneksyon kang Bernardo.
Matud ni Miranda, ang kaso gisulod sa regular raffle ug walay basihanan nga siya nga mag-inhibit, busa nagpadayon siya sa iyang katungdanan.
Dugang pa niini, dili maapektuhan sa personal nga relasyon ang iyang mga desisyon ug susihon ang mosyon aron masuta kung adunay rason para sa boluntaryong pag-inhibit.
Sumala sa tigpamaba ni Revilla nga si Atty. Francesca Señga, importante nga makita sa publiko ang impartiality sa mga huwes, nga dili lang sa buhat kundi apil sa hitsura.
Samtang, ang prosekusyon mitubag nga dili dawaton ang mosyon ug gitawag kini nga delaying tactic, nga gipanghimakak sa kampo ni Revilla ug giingon nga usa kini ka lehitimong paggamit sa iyang katungod isip akusado.