Nagpagawas og showcause order ang Land Transportation Office Region 10 batok sa nag-organisa sa Boss Ironman Edurance Challenge nga hinungdan sa sunod-sunod nga aksidente sa kadalanan sa mga big bike riders ug pakadamay sa pipila ka indibidwal.
Sa ekslusibong pakighinabi sa Bombo Radyo Malaybalay kang Director Nelson Manaloto sa Land Transportation Office Region 10, gisulti niini nga nagpagawas na og showcause order ang ilang buhatan batok sa maong organisayson human sa mga aksidenteng natigayon ilabi nga adunay natala nga namatay sa lalawigan sa Bukidnon gumikan niini.
Nunot sa maong isyu, gikakurat sa opisyal ang pagbuto sa maong balita gumikan wala matud pa kini midangop o nakigkoordinar sa buhatan sa LTO alang sa pagpasiugda sa maong kalihukan.
Samtang sa pikas bahin giduso ni konsehal Mauricio Sistoso ang bag-ong ordinansa sa pagdumili pagtugot sa mga motoristang kalihukan sama sa Boss Ironman Endurance Challenge sa dakbayan sa Valencia.
Matud sa opisyal, kini nga ordinansa nagtumong sa pagpanalipod sa kinabuhi sa mga motorista, pedestrian, ug sa tanang katawhan, ug sa pagsiguro nga ang atong mga dalan magpabiling luwas ug maayong gamiton sa tanan.
Lakip usab ang nagpatuman og regulasyon ang dakbayan sa Kidapawan diin hugot nga nagpagawas og pamahayag ang mayor sa maong syudad nga si Mayor Jose Paolo Evangelista, diin nagdumili usab sa susamang kalihukan ilabi gumikan wala kini pakabana sa balaod trapiko.