Gipanghimakak sa kampo ni Binibining Pilipinas Grand International 2021 Samantha Panlilio nga wala’y kamatuoran ug walay lig-on nga basehan ang mga alegasyong gidayag sa drayber ug personal assistant sa aktres nga Rhian Ramos nga adunay kalabotan sa gikaingong illegal detention ug pagpang-abuso nga matud pa nahitabo sa usa ka condominium unit sa Makati.
Sumala sa mga taho, nagpasa og reklamo sa National Bureau of Investigation ang maong drayber ug gilakip niini sila Panlilio, Ramos, ug beauty queen Michelle Dee, apan hingpit nga gipanghimakak sa kampo nga dili makatarungan ug dili motakdo sa aktuwal nga mga panghitabo ang mga pamahayag sa drayber.
Bisan wala pa’y opisyal nga pamahayag si Panlilio, gidayag nga andam ang kampo niini nga moatubang sa bisan unsang imbestigasyon aron mapamatud-an ang kabahin niini.
Sa laing bahin, matud sa legal counsel nila Rhian ug Michelle, adunay mga petsa ug detalye sa reklamo nga dili motugma sa tinuod nga kahimtangan ug lokasyon sa mga gipanglambigit, hinungdan nga gikonsiderar ang pagpasaka usab sa kampo niini og kasong libel ug perjury batok sa nagreklamo.
Sa pagkakaron, padayon pa ang imbestigasyon sa NBI ug wala pa’y pormal nga kasong napasaka batok sa mga giakusahan.