Padayon ang pagpangita sa upat (4) ka Filipino crew members human ang cargo vessel nga MV Devon Bay, gikan sa Gutalac, Zamboanga del Norte, paingon sa Guangdong, China, nalunod sa West Philippine Sea duol sa Agno, Pangasinan. Ang barko nagkarga og puthaw sa dihang nahitabo ang disgrasya.
Malampusong naluwas ang kinse (15) ka tripulante pinaagi sa tabang sa China Coast Guard (CCG), apan duha ang namatay. Makita sa video ang emosyonal nga panagtagbo sa mga naluwas nga nagginakosay ug naghilak samtang gipahiluna sa barko sa CCG.
Nagpasalamat ang Philippine Coast Guard (PCG) sa humanitarian assistance sa China ug nagpahimangno nga obligasyon sa matag nasod ang pagluwas sa kinabuhi sa kadagatan. Gipaningkamutan karon ang luwas nga pag-transfer sa mga survivors samtang padayon ang monitoring sa BRP Teresa Magbanua ug koordinasyon sa Hong Kong Rescue Coordinating Center.