Nakatala og 270 ka vehicular accident sulod sa tuig 2025 ang City Transportation and Traffic Management Division sa syudad sa Valencia.
Sumala sa datos, ang nag-unang hinungdan sa mga disgrasya mao ang driver nga pagkalango sa ilimnong makahubog ug overspeeding, nga nagpadako sa risgo sa aksidente.
Pinakadaghan ang narehistro nga aksidente sa Barangay Poblacion nga miabot sa 150 ka kaso, gisundan sa Barangay Bagontaas nga adunay 36 ka aksidente, Barangay Lumbo nga may 25, ug Barangay Batangan nga adunay 16 ka insidente.
Giingon ni Dr. Nilo Suete Gonzaga, City Transportation and Traffic Management Division Officer, nga padayon ang awtoridad sa pag-awhag sa mga motorista sa pagpabiling responsable sa pagmaneho.
Dugang pa niini naka-impound usab ang ilang buhatan og kapin 700 ka motorsiklo nga nagikan sa nagkadaiyang lungsod ug dakbayan.
Gipahimangnuan ang publiko sa paglikay sa pag-inom og makahubog nga ilimnon samtang nagmaneho ug sa pagsunod sa speed limits.
Gilauman nga pinaagi sa maong mga pahimangno, mapamenos ang vehicular accidents ug malikayan ang mas grabeng insidente sa kalsada.