Gipahibalo ni Mayor Jay Warren Pabillaran nga nagpaabot ang kagamhanang lokal sa Malaybalay sa opisyal nga tubag sa PrimeWater sa gipasaka nga Show Cause Order tungod sa kapakyasan sa kompanya sa paghatag og episyente, kasaligan, ug igong suplay sa tubig sa dakbayan.
Sa pakighinabi sa Bombo Radyo Malaybalay gipatin-aw sa Mayor nga lahi ang proseso sa pre-termination tali sa Malaybalay City Water District ug PrimeWater kumpara sa business permit review sa LGU.
Gihatagan og provisional permit ang PrimeWater samtang naghulat sa ilang tubag sulod sa 15 ngadto sa 20 ka adlaw, ug mahimong bawi-on kini kon mapamatud-an nga dili makatarungan ang ilang paliwanag o mapakyas sa ilang obligasyon.
Gipasalig ni Mayor Pabillaran nga andam motabang ang dakbayan pinaagi sa Malaybalay Water System project nga nagkantidad og ₱325 milyon aron masiguro ang suplay sa tubig sa habagatang bahin sa siyudad ug matubag ang panginahanglan sa mga residente.