Giawhag ni Presidente Ferdinand Marcos Jr. ang mga residente sa Bangsamoro Autonomous Region in Muslim Mindanao (BARMM) nga aktibong musalmot sa umaabot nga eleksyon aron mapalig-on ang demokrasya ug mapatigbabaw ang accountability sa kagamhanan.
Gihimo sa Presidente ang maong panawagan atol sa selebrasyon sa ika-pito nga anibersaryo sa pagakatukod sa BARMM nga gipahigayon sa Shariff Kabunsuan Cultural Complex kagahapon.
Matud pa sa Presidente, ang piniliay usa ka mahinungdanong higayon alang sa mga Bangsamoro nga gawasnon nga ikapadayag ang ilang tingog ug mga tinguha alang sa rehiyon. Gihisgutan usab niii nga ang National Government andam muhatag og suporta sa matag lakang sa BARMM aron masiguro ang maayong pagdumala.
Gipadayag ni Marcos Jr. nga dako ang iyang kadasig sa iyang nakita nga kausaban sa sentimento sa mga tawo sa Cotabato.
Saysay pa niini, adunay dakong paglaum alang sa usa ka mas hayag nga kaugmaon nga giisip niini nga usa sa mga dagkong kalampusan sa pagtukod sa Bangsamoro.