Malampusong nakuha sa Memphis Grizzlies ang kadaugan batok sa Orlando Magic, 126–109, sa gipahigayon nga NBA Global Games didto sa O2 Arena, London.
Nangulo sa Grizzlies ang ilang pambatong point guard nga si Ja Morant, kinsa mitala og double 24 points ug 13 assists sa iyang unang dula human sa unom ka duwa nga pahuway tungod sa injury sa iyang bagtak.
Gipakita sa Memphis ang ilang dominasyon sayo sa dula diin milabaw sila og hangtod sa 33 points sa unang bahin. Nahuman ang halftime sa score nga 72–53 pabor sa Grizzlies. Gawas kang Morant, dako sab og natabang si Jock Landale nga miamot og 21 points gikan sa bench, samtang si Jaren Jackson Jr. nidugang og 17 puntos.
Kini nga kadaugan nagsilbing “revenge” sa Grizzlies human sila mapildi sa Magic sa ilang dula didto sa Berlin, Germany milabay nga semana. Tungod niini, tabla (1-1) ang ilang serye sa duha ka dula sa Europe karong season.