Usa ka aksidente ang nahitabo takna alas 2:15 sa kaadlawon niadtong Enero 18, 2026 daplin sa Sayre Highway, Purok 6, Barangay Tubigon, Maramag, Bukidnon, nga naglambigit sa usa ka dump truck ug usa ka motorsiklo.
Sumala sa report sa Bukidnon Police Provincial Office (BPPO), ang dump truck nga Shacman, kolor pula, gimaneho sa 34-anyos nga lalaki nga adunay balidong driver’s license, samtang ang motorsiklo nga Euro Motor R125 gimaneho sa 24-anyos nga lalaki nga wala makapresentar og driver’s license ug rehistro sa sakyanan (OR/CR).
Base sa inisyal nga imbestigasyon sa kapulisan, ang dump truck nagabiyahe gikan sa Valencia City padulong sa Maramag, samtang ang motorsiklo nagikan sa Don Carlos padulong sa Valencia City.
Pag-abot sa maong dapit, misulod kuno sa lane sa dump truck ang motorsiklo, hinungdan nga misulay paglikay ang drayber sa dump truck pinaagi sa pagliko sa pikas lane. Bisan pa niini, tungod sa paspas nga dagan sa motorsiklo, nahitabo gihapon ang bangga ug natumbok sa motorsiklo ang tuong atubangan nga bahin sa dump truck.
Nadaot ang duha ka sakyanan tungod sa insidente, samtang nasamdan ang drayber sa motorsiklo nga gilayon gidala sa Bukidnon Provincial Hospital–Maramag sa tabang sa Maramag Rescue Team aron matambalan.
Boluntaryong misurender ang drayber sa dump truck sa traffic investigator alang sa hustong imbestigasyon, samtang ang duha ka sakyanan gidala sa Maramag Municipal Police Station alang sa hustong disposisyon ug dugang nga proseso sa kaso.