Mukabat sa kapin P70 milyon ang mga collectables sa property tax sa City Government of Malaybalay.
Sa eksklusibong pakighinabi sa Bombo Radyo Malaybalay kang City Mayor Jay Warren Pabillaran, gipaniguro niini nga ang buhis nga ginabayran sa katawhan sa syudad gidumala ug napaingon sa husto ug makiangayon nga pamaagi.
Matud pa sa Mayor, usa sa nag-unang prayoridad sa paggamit sa maong pundo mao ang pagpalambo sa imprastraktura ug pagtukod og dugang nga mga tulonghaan aron mas mapauswag ang kahimtangan sa edukasyon ug serbisyo publiko sa dakbayan.
Gani, kagahapong adlawa, Enero 20, 2026, gipahigayon ang Turnover Ceremony of Infrastructure Projects sa nagkadaiyang barangay sa syudad sa Malaybalay, isip kabahin sa konkretong ebidensya sa husto nga paggamit sa pundo sa lokal nga kagamhanan.
Lakip sa mga proyekto ang Construction of Perimeter Fence with Gate sa Purok 3A, Barangay Plaza, nga adunay Approved Budget nga P1,000,000, apan ang aktuwal nga Project Cost miabot lamang sa P890,610.47.
Gisundan kini sa Construction of Access Road padulong sa Brgy. Zamboanguita Elementary School, nga adunay Approved Budget nga P6,000,000, apan ang Project Cost miabot lamang sa P4,535,027.03.
Lakip usab sa giturn-over nga mga proyekto ang Construction sa duha ka yunit sa Multipurpose Drying Pavement sa P6–Indalasa ug P4–Zamboanguita, nga adunay Approved Budget nga P1,235,259.28 ug Project Cost nga P1,033,689.90.
Sa kinatibuk-an, ang Total Approved Budget sa mga proyekto miabot sa P8,235,259.28, samtang ang Total Project Cost P6,459,327.40, nga miresulta sa kinatibuk-ang savings nga P1,775,931.88.