Gipagawas sa Third Division sa Sandiganbayan ang warrant of arrest ug hold departure order (HDO) batok kang kanhi Senador Ramon “Bong” Revilla Jr. ug unom ka uban pa nalambigit sa kasong malbersasyon sa pondo sa publiko.
Ang kaso may kalabutan sa giingong “ghost flood control project” sa Pandi, Bulacan nga nagkantidad og kapin ₱92.8 milyones. Lakip sa mga giapil sa warrant ang mga opisyal sa DPWH Bulacan First District Engineering Office nga sila Brice Hernandez, Jaypee Mendoza, Arjay Domasig, Juanito Mendoza, Emelita Juat, ug Christina Pineda.
Nabuksan pag-usab ang kaso human sa pagbutyag ni kanhi DPWH Undersecretary Roberto Bernardo nga adunay mga senador ug magbabalaod nga kunoy nakadawat og kickbacks sa flood control projects. Hugot gihimakak sa kampo ni Revilla ang mga pasangil ug miingon nga wala siyay kalambigitan sa bisan unsang anomaliya.