Mitaliwan na ang drayber sa wing van nga nadisgrasya sa Purok 4, Barangay Patpat, ning syudad.
Sa inisyal nga imbestigasyon, napasok sa yuta nga nagpalibot sa highway ang gimanehoan niini nga wing van nga kargado sa sinakong harina kagahapong adlawa, Enero 18, 2025, pasado alas 4:00 sa hapon.
Matud ni PMSg. Kurt Jobem Okit, investigator sa Malaybalay City Police Station, giila ang drayber nga si Michael Bryan Dela Dantos Duay, residente sa Aplaya, Davao City.
Nasayran usab sa mga otoridad nga wala nay pahinante nga sakay ang maong sakyananan tungod mikanaog na kini sa wala pa mahitabo ang insidente.
Gikatahong posibleng nawad-an og kontrol ang drayber hinungdan nga mibangga ang wing van sa yutang nagpalibot sa kilid sa highway.
Samtang swerte usab nga nakalikay sa aksidente ang drayber sa motorela nga si Julieto Ebal, 59 anyos, residente sa Purok 2 sa maong barangay, human kini naovertakekan ug hapit nasideswipepan sa wing van sa crossing boundary sa Pal-ing ug Kalasungay tungod sa kakusog sa dagan sa maong sakyanan.
Sa pagkakaron, padayon pa ang imbestigasyon sa mga otoridad aron matino ang tibuok detalye ug eksaktong hinungdan sa nahitabong aksidente.