Gitandi ni Senate President Pro Tempore Panfilo Lacson ang paggamit sa gitawag nga “allocables” sa national budget nga gituohang may kalabotan sa kickbacks isip usa ka planned robbery o tinuyo nga pagpangawat sa nasud.
Sumala kang Lacson, ang mga opisyal sa gobyerno nga magsumite og wish list sa mga proyekto aron makakuha og komisyon o kickback gikan sa allocable funds mura na usab og nangawat sa pondo sa nasud.
Gipunting niini, nga wala’y papel ang mga mambabalaod sa pagpili sa mga proyekto sa National Expenditure Program (NEP) nga giandam sa executive branch.
Gidugang pa niya nga limitado ra ang papel sa Kongreso ug kinahanglan magpasa lamang og amendments human maaprubahan ang NEP.
Ang maong pahayag gihimo una pa ang Senate Blue Ribbon Committee inquiry sa gitawag nga “Cabral Files” nga magsugod sa Enero 19.
Ang Cabral Files giingong naglangkob sa detalyadong listahan sa mga proyekto sa matag legislative district ug sa ilang mga proponents.
Sa miaging hearing, migawas nga ubos sa giingong scheme, ang mga senador ug miyembro sa Kamara posibleng makadawat og allocables ug makakuha og kickback nga dili moubos sa 25% sa kantidad sa proyekto.
Giklaro ni Lacson nga pwede mangayo og pondo para sa proyekto, apan kung ang allocables isulod na daan sa NEP aron makakuha og komisyon, kini mahimo nga planned o attempted robbery.
Tungod niini, tutukan sa Senate committee ang authentication sa Cabral Files uban sa DPWH.
Matod ni Lacson, kung dili kini ma-authenticate, dili mahimong gamiton isip opisyal nga record sa komite.