Gikataho nga nagpadayon ang pagkuhod sa kantidad sa piso sa Pilipinas batok sa dolyar sa Amerika. Sumala sa pinakaulahing datos niining tunga-tunga sa Enero 2026, ang lokal nga kantidad niabot na sa bag-ong record low nga P59.43 matag dolyar, butang nga gikabalak-an sa daghang mga negosyante ug eksperto sa ekonomiya.
Gibutyag sa impormasyon nga ang maong pag-ubos sa peso giduso sa nagkalain-laing rason, lakip na ang kusog nga demanda sa dolyar sa gawas sa nasod ug ang mga isyu sa politika ug ekonomiya dinhi sa nasod.
Bisan pa niini, ang Bangko Sentral ng Pilipinas (BSP) nagpabiling mabinantayon ug andam nga mopatunga kon gikinahanglan aron mapugngan ang sobrang pag-uyog sa merkado.
Samtang makabenepisyo ang mga pamilya sa mga OFW tungod sa mas taas nga balos sa ilang padala, gipahinumdoman usab ang publiko nga mahimo kining moresulta sa pagsaka sa presyo sa mga imported nga palitunon ug lana.