Gipanghimakak ni Police Brig. Gen. Hansel Marantan,direktor sa Philippine National Police Highway Patrol Group (PNP-HPG), ang mga pasangil sa kampo ni kanhi Ako Bicol Party-list Rep. Zaldy Co nga “carnapping” ang nahitabong pagkumpiska sa dose (12) ka mga luxury vehicles niini.
Matud ni Marantan, legal ang gihimong operasyon sa kapulisan ug dili kini matawag nga kawat tungod kay nananghid sila sa kampo sa kanhi opisyal sa wala pa kuhaa ang mga unit.
Gihatagan matud pa og mga resibo ang kampo ni Co ug gidala ang mga sakyanan sa ICI Compound alang sa saktong kustodiya.
Saysay pa niini gilusad ang operasyon base sa duha ka dagkung rason sama sa violations sa Bureau of Customs ug Intel Gathering.
Bisan pa man niini, giklaro ni Marantan nga sa inisyal nga inspeksyon, wala silay nakitang mga ilegal nga armas o bisan unsang kontrabando sa sulod sa mga sakyanan.
Naghatag usab og warning ang HPG sa mga indibidwal nga nagatago sa uban pang mga sakyanan nga subject sa imbestigasyon.
Matud sa direktor, mas maayong isurender na kini sa kapulisan tungod kay dili kini matago og dugay ug mag-atubang gayod sa legal nga proseso ang kinsa man nga malambigit niini.