Gikatahong andam si Presidente Ferdinand Marcos Jr. nga atubangon ang bisan unsang reklamong impeachment nga posibleng isaka batok kaniya sa mga kaatbang sa pulitika.
Matud ni Palace Press Officer Usec. Atty. Claire Castro, walay rason ang Presidente nga talikdan ang impeachement tungod kay duna kini pagsalig nga walay gihimong ilegal o iregularidad ang iyang administrasyon.
Gipasabut ni Castro nga bisan pa man kung dunay planong iduso ang impeachment, giisip kini sa Palasyo nga sayo pa kayo sanglit wala pay pormal nga reklamo nga nadawat ang Kongreso. Gihimakak sa opisyal ang mga pasangil nga dunay “breach of trust” ang Presidente kalabot sa pagpirma sa mga miaging National budget.
Gipahinumdom ni Castro nga si Presidente Marcos mismo ang nagmando sa pag-imbestiga sa mga flood control projects nga nalambigit sa anomaliya ug nagmando usab kini og mas estrikto nga mga lagda sa 2026 National Budget aron maseguro nga maprotektahan ang pondo sa katawhan.
Dugang pa niini, gitumbok ni Castro nga ang mga tigpaluyo sa pamilyang Duterte ang nagpaluyo sa maong plano. Matud sa opisyal, mas maayo nga tabangan sa maong pundok si Vice President Sara Duterte sa pagpatin-aw sa isyu sa confidential funds kaysa mag-sentro sa pag-atake sa Presidente.
Dugang pa niini gipahayag sa Malacañang nga nagpabiling lig-on ang suporta sa mga magbabalaod ngadto sa Presidente hinungdan nga masaligon ang administrasyon nga dili mulampos ang bisan unsang lakang sa pagtangtang kaniya sa pwesto.