Hingpit ng wagtangon sa Department of Public Works and Highways (DPWH) ang sistema sa “allocables” sa paggahin og pundo sa mga distrito. Sumala ni DPWH Sec. Vince Dizon, kini nga lakang gihimo human malambigit ang maong sistema sa mga alegasyon sa korapsyon.
Gipasalig ni Sec. Dizon nga pulihan ang karaan nga sistema og usa ka bag-ong formula nga ibase sa aktuwal nga panginahanglan sa matag distrito, probinsya, munisipalidad ug rehiyon. Ubos sa bag-ong palisiya ang tanang proyekto kinahanglan nga adunay klaro nga plano ug gasto ingon man aprubado sa Development Council sa dili pa kini iapil sa budget.
Giklaro usab niini nga dili na awtomatikong malakip sa budget ang mga proyekto nga gi-endorso lamang sa mga mambabalaod o lokal nga opisyal kon kini walay saktong pagtuon. Masaligon si Dizon nga suportahan ni Presidente Ferdinand Marcos Jr. ang maong kausaban aron maseguro ang transparency sa kagamhanan.