Nagpahigayon og manhunt operation ang mga awtoridad sa South Africa human sa usa ka makalilisang nga insidente sa pagpamusil sa usa ka tavern sa Bekkersdal, usa ka township nga nahimutang sa gold-mining area duol sa Johannesburg, nga mikalas sa kinabuhi sa siyam (9) ka indibidwal ug samdan ang napulo (10) ka uban pa.
Sumala sa kapulisan, gibana-banaang kapin sa 12 ka wala pa mailhing mga armado ang miabot sakay sa duha ka sakyanan, dala ang mga pistola ug AK-47, diin walay kaluoy nga gipaulanan og bala ang mga tawo sulod sa tavern niadtong Domingo.
Pito ka lalaki ug duha ka babaye ang lakip sa mga namatay.
Matud sa mga awtoridad, may balidong lisensya ang tavern apan wala pa gihapon matino ang motibo sa pagpamusil.
Sa pagkakaron, padayon ang imbestigasyon ug pagpangita sa kapulisan aron mailhan ang mga suspek ug aron masuta ang hinungdan sa maong insidente.